RAIS wa Zanzibar na Mwenyekiti wa Baraza la Mapinduzi, Dk. Hussein Mwinyi amepongeza Benki ya CRDB kwa mchango wake mkubwa katika utoaji mikopo ya nyumba, akitoa wito kuongezwa juhudi zaidi ili kuwawezesha watu wengi kupata makazi bora.

Alitoa pongezi hizo jana alipofungua mkutano wa 40 wa mwaka wa Umoja wa Afrika wa Fedha za Makazi (AUHF) na Mkutano Mkuu wa Mwaka (AGM) unaofanyika visiwani hapa kuanzia tarehe 14 hadi 18 Oktoba mwaka huu, Benki ya CRDB ikijiunga tena na shirika hilo la barani.

"Kuanzia Juni 2024, nimeambiwa kuwa, idadi ya benki za biashara na taasisi za kifedha zinazotoa mikopo ya nyumba ilikuwa 31, zikiwezesha jumla ya Sh. bilioni 625, sawa na dola za Marekani milioni 234.3 kama mkopo kwa ajili ya ununuzi wa nyumba. 

"Ingawa hii inaonesha tumepiga hatua kubwa, juhudi zaidi zinahitajika kuhakikisha kila mtu anapata fursa ya mikopo ya nyumba kwani hii ni njia sahihi ya kumiliki nyumba nzuri na kuishi kwa heshima," alisema Rais Mwinyi.

Alisisitiza kuwa Benki ya CRDB ikiongoza katika utoaji mikopo ya nyumba kwa asilimia 34.4, ni mfano mzuri kwa washindani wake ambao wanahitaji kuja na mikakati iliyobuniwa ili kufikia wateja wengi zaidi na hivyo kuchangia zaidi katika sekta ya mikopo ya nyumba na uchumi kwa ujumla.

Rais Mwinyi alizitaka benki za biashara na taasisi za kifedha kutoa ushauri wao bora kuhusu namna ya kuongeza idadi ya watu wanaopata mikopo ya nyumba nchini.

Licha ya kuwa na idadi kubwa ya wakopeshaji nchini, Rais Mwinyi alisema Watanzania wengi hawawezi kufikia mikopo ya nyumba, hali inayowafanya kutumia muda mrefu kukamilisha ujenzi wa nyumba zao, jambo ambalo linafanya ujenzi kuwa ghali zaidi.

"Ninyi ni wataalamu katika eneo hili. Milango ya serikali iko wazi kukaribisha maoni yenu juu ya jinsi ya kukabiliana na changamoto hizo. Tafadhali shirikianeni nasi ili kuzitatua na kuruhusu Watanzania wengi kadri iwezekanavyo waweze kupata mikopo ya nyumba," aliagiza Rais Mwinyi.

Kuhusu mchango wa Benki ya CRDB, Mkurugenzi wa Wateja Wadogo na wa Awali wa benki hiyo, Bonaventura Paul, alisema kuwa, "hadi Juni mwaka huu, tulikuwa tumetoa jumla ya Sh. bilioni 208.34, zikinufaisha wateja 1,628 na uwezo wetu ni zaidi ya hapo, hivyo tunakaribisha wateja wengi zaidi kuchangamkia fursa ya kujenga na kumiliki nyumba nzuri.

"Katika Benki ya CRDB tunatoa mikopo ya nyumba kwa ajili ya makazi ya biashara. Tuna uwezo wa kutosheleza mahitaji na matarajio ya wateja wetu. Tunakaribisha yeyote anayeweza na anayeshawishika kwa mikopo," Bonaventura alikaribisha wateja.

Alisisitiza umuhimu wa kuvutia rasilimali zaidi kwa kuwa taasisi za kifedha zilizopo zinaweza kutoa mikopo ya nyumba 200,000 tu kwa mwaka, na kuacha nchi ikiwa na upungufu wa nyumba milioni tatu ambao umekuwapo kwa muda mrefu bila kushughulikiwa. Alisema ikiwa hakuna hatua bunifu zinazochukuliwa, nchi itakumbana na upungufu huo kwa miaka mingi zaidi na kuathiri hata vizazi vijavyo.

Takwimu rasmi za mikopo ya nyumba zinaonesha kuwa wastani wa mkopo wa nyumba kwa kila mkopaji kufikia Juni 2024, ulikuwa Sh. milioni 104.8, sawa na dola 39,286.2, huku mahitaji ya makazi na mikopo ya makazi yakiwa juu nchini, changamoto zinazohitaji juhudi za pamoja kushughulikia.

"Ukosefu wa hati miliki kwa Watanzania wengi ni moja ya changamoto kubwa inayowafanya wengi kushindwa kupata mikopo ya nyumba. Serikali inapaswa kutafakari na kuona jinsi inavyoweza kushughulikia hali hii. Mara baada ya hili kushughulikiwa, wengi wataweza kukidhi vigezo vya mikopo inayotolewa," alisisitiza Bonaventura.

Utafiti unaonesha kuwa ni asilimia tatu tu ya Watanzania wana hati miliki, hivyo kukosa moja ya vigezo vya mikopo ya nyumba, na kuacha idadi kubwa ya watu wasio na sifa ambao wanalazimika kujenga nyumba kwa kutumia vyanzo vingine vya fedha, ujenzi ambao ni ghali zaidi.

Benki ya CRDB mwaka huu imejiunga tena na AUHF, umoja unaokusanya pamoja benki zinazotoa mikopo, taasisi za ujenzi, mashirika ya nyumba na mashirika mengine ya fedha za makazi kutoka nchi 17 barani Afrika ili kukusanya fedha za makazi ya bei nafuu na nyumba barani Afrika.

Mkutano wa mwaka huu, ambao AUHF imeshirikiana na Shirika la Kimataifa la Masoko Makubwa ya Mikopo (ISMMA), unalenga kuimarisha maendeleo ya soko, kuboresha ufanisi na kushughulikia changamoto katika masoko ya makazi barani Afrika ambapo upungufu wa makazi ni changamoto kubwa kwa nchi nyingi.