TANZANIA imeshukuru Umoja wa Ulaya (EU) kwa kuendelea kuwa miongoni mwa washirika wakubwa wa kimkakati wa maendeleo nchini katika kuisaidia masuala ya bajeti na sekta muhimu licha ya ukweli kwamba baadhi ya washirika wa maendeleo walijiondoa.

Hayo yalisemwa jana na Katibu Mkuu Wizara ya Fedha, Dk. Natu El-maamry Mwamba, wakati akifungua kikao cha majadiliano kwa ajili ya kusaidia bajeti ya Serikali ya Tanzania jijini Dar es Salaam, kikijumuisha wataalamu kutoka Serikali ya Tanzania na EU. 

Dk. Mwamba alisema serikali inatambua mchango mkubwa wa EU katika kuchangia maendeleo ya nchi ambapo kwa mwaka wa fedha uliopita (2023/24), walisaidia Euro milioni 40.819 kwa ajili ya kuongeza nguvu katika sekta za nishati, uchumi wa buluu, digitali, usawa wa kijinsia na Mradi wa Green and Smart Cities.

"Tumeshuhudia maendeleo ya makubwa na mazuri chini ya programu hii kutoka katika mtazamo wa sera hadi mafanikio halisi ikiwamo kufuatilia maendeleo ya utekelezaji wa Awamu ya Nne ya Programu ya Marekebisho ya Usimamizi wa Fedha za Umma, Mpango wa Corporate Plan-6 na Mpango Mkuu wa Maendeleo ya Sekta ya Fedha katika mtazamo wa sera," alisema.

Dk. Mwamba aliongeza kuwa upande wa utendaji, msaada mkubwa umekuwapo katika kukamilisha Mfumo wa Kitaifa wa Kutoa Hati Fungani za Kijani (Green Bonds), kuanzishwa kwa Mfuko wa Kitaifa wa Uwekezaji wa Mitaji, kupungua kwa asilimia ya kadirio la kodi, kuongezeka kwa usajili wa walipakodi na ongezeko la mikopo kwa wajasiriamali wadogo na wa kati (MSME) kati ya jumla ya mikopo inayotolewa na benki na taasisi ndogo za fedha nchini.

Mkuu wa Masuala ya Ushirikiano wa EU, Marc Stalmans, alishukuru Tanzania kwa kuendelea kuwa mdau mzuri wa umoja huo na msimamizi mzuri wa shughuli zake ambazo zina manufaa kwa wananchi wake.

"Tanzania ni mshirika wa karibu sana wa Umoja wa Ulaya katika mtazamo wa kiuchumi, na kwa hivyo, tunathamini sana ushirikiano tulionao na Tanzania na utakuwa na nguvu zaidi katika siku zijazo," alisema Stalmans.

Aliongeza kuwa Tanzania inafanya vyema kwa kutokuwa na kiwango kikubwa cha deni, ambacho ni kiwango cha deni kilicho chini ya asilimia 40, ukifananisha na nchi nyingine za ukanda wa Afrika Mashariki,  pia kuna fursa zinavyomiminika kuelekea sekta binafsi, jambo ambalo linaongeza chachu katika ukuaji wa uchumi.

Kikao hicho kilihudhuriwa na Naibu Gavana wa Benki Kuu ya Tanzania, Sauda Msemo, Kamishna Msaidizi wa Idara ya Fedha za Nje, James Msina, Kamishna Msaidizi wa Idara ya Uendelezaji wa Sekta ya Fedha - Wizara ya Fedha, Dionisia Mjema, Mkaguzi wa Ndani Mkuu wa Serikali (IAG), Benjamin Magai, Mkuu wa Masuala ya Msaada kati ya Tanzania na Umoja wa Ulaya, Kitengo cha Uratibu na Ushirikiano, Jonathan Mpuya, wataalamu wengine wa serikali na Umoja wa Ulaya.