WATAALAM wa Ubia kati ya Sekta ya Umma na Sekta Binafsi nchini wameagizwa kuhakikisha miradi yote mikubwa yenye mvuto wa kibiashara nchini inatekelezwa kwa ubia kati ya Sekta ya Umma na Sekta Binafsi (PPP) ili kuipunguzia Serikali mzigo wa kugharamia miradi hiyo.

Agizo hilo limetolewa leo jijini Dodoma na Naibu Katibu Mkuu, Wizara ya Fedha, Jenifa Omolo, kwa Niaba ya Katibu Mkuu, Wizara ya Fedha, Dk. Natu Elmaamry Mwamba, wakati akifungua Kikao Cha Kuimarisha Ushirikiano kati Serikali ya Mapinduzi ya Zanzibar na Tanzania Bara kuhusu masuala ya ubia kati ya Sekta ya Umma na Sekta Binafsi (PPP).

Amesema utekelezaji wa miradi kupitia PPP ni sehemu ya kujenga uchumi imara na ni suala ambalo linatekelezwa na nchi nyingi ulimwenguni.

“Msiogope, hata nchi zilizoendelea zinateleza miradi yao kupitia PPP, ukiangalia madaraja na majengo mbalimbali wameyatekeleza kupitia PPP, Sekta Binafsi wakipewa nafasi wanafanya vizuri”, amebainisha Omolo.

Amewaagiza wataalamu hao kukuza uelewa wa dhana ya PPP kwa wadau mbalimbali kwa kuwa bado kuna changamoto ya uelewa wa dhana hiyo pamoja na faida zake.

Naye,Naibu Katibu Mkuu, Ofisi ya Rais, Kazi, Uchumi na Uwekezaji, Zanzibar, Rashid Ali Salim, aliwaagiza wataalam hao kuhakikisha wanayafanyia kazi yale yote waliyokubaliana katika kikao hicho hususani suala la kuwa na mkakati wa pamoja wa kuuza fursa na kuibua miradi ya pamoja ya PPP ili kuimarisha sekta ya PPP nchini.

Naye, Kamishna wa Kituo cha Ubia Kati ya Sekta ya Umma na Sekta Binafsi (PPPC), David Kafulila amesema katika kikao hicho wamejadiliana mambo mbalimbali ya kurahisisha suala la ubia nchini ili kuipunguzia mzigo Serikali wa kugharamia miradi ya maendeleo ambayo inaweza kugharamiwa kupitia PPP.

Amesema Tanzania kwa sasa inafanya vizuri katika eneo la PPP ambapo kwa Tanzania Bara kuna takribani miradi 74 ambayo ipo katika hatua za mwisho kuanza kutekelezwa na Zanzibar kuna zaidi ya miradi 13.

"Tumekubaliana mambo mengi kuhakikisha kwamba katika eneo hili la ubia tunafanya mkubwa zaidi na tunakubaliana kitumia sekta binafsi kufanya miradi ambayo serikali ingeweza kufanya kwa kutumia kodi, mikopo, ushuru, tozo pamoja misaada," amesema Kafulila.

Amesisitiza kwamba kuna umuhimu wa kuzidi kuongeza nguvu ya kutumia eneo hili la ubia kufanikisha miradi mingi ambayo ingeweza kuhitaji kutumia kodi," amesema.

Kamishna huyo ameongeza kuwa Tanzania inafanya vizuri kwenye mikopo kwa kuwa ripoti zinaonyesha uwiano wa deni na uchumi wa Tanzania ni asilimia 47, kiwango ambacho kiko chini ukilinganisha na mataifa mengine ya Afrika Mashariki.