Simba Queens yasaka rekodi

By Somoe Ng'itu , Nipashe

Published at 09:35 AM May 15 2024

Picha: Simba Sc

Washambuliaji wa Simba Queens; Aisha Mnunka (kushoto), Ruth Ingosi (katikati) na Jentrix Shikangwa wakishangilia bao katika mechi ya Ligi Kuu ya Wanawake Tanzania dhidi ya Bunda Queens iliyochezwa wiki iliyopita. Simba ilishinda mabao 4-0.

BAADA ya kukaribia kutwaa ubingwa wa Ligi Kuu ya Wanawake Tanzania, Simba Queens inataka kumaliza msimu huu bila ya kufungwa mechi hata moja.

Kocha Mkuu wa Simba Queens, Mussa Hassan 'Mgosi' ameliambia gazeti hili anataka kushinda mechi zote zilizosalia na hatawadharau wapinzani wao kwa sababu anataka kuweka rekodi ya kutopoteza mchezo.

Mgosi alisema wanaheshimu kila timu wanayocheza nayo na kwao kila mechi ni sawa na fainali.

"Tunataka kushinda mechi zote, tunataka kumaliza msimu na rekodi nzuri, hatutabweteka, tunataka kushinda michezo iliyobakia, tunaendelea kujipanga ili kuhakikisha tunafikia malengo," Mgosi alisema.

Bingwa wa Ligi Kuu ya Wanawake Tanzania ataiwakilisha Bara katika mashindano ya kimataifa ya Klabu Bingwa Afrika Mashariki na Kati (CECAFA), yatakayofanyika baadaye mwaka huu.

JKT Queens ya Tanzania Bara ndio ilikuwa inashikilia ubingwa wa CECAFA ambao iliwavua Simba Queens msimu uliopita, lakini Maafande hao waliishia hatua ya makundi kwenye michuano ya Ligi ya Mabingwa Afrika kwa wanawake.