NAHODHA wa Timu ya Soka ya Taifa (Taifa Stars), Mbwana Samatta, amesema Tanzania imepangwa katika kundi gumu kwenye Fainali za Kombe la Mataifa ya Afrika (AFCON 2025), ambazo zitafanyika mwaka huu nchini Morocco.

Taifa Stars imepangwa Kundi C katika fainali hizo zitakazofanyika kuanzia Desemba 21, mwaka huu hadi Januari 18, mwakani ikiwa pamoja na Uganda, Tunisia na Nigeria.

Stars itatupa karata yake ya kwanza Desemba 23, mwaka huu kwa kukutana na Nigeria halafu Desemba 27 itavaana na Uganda na itamaliza mechi za hatua ya makundi Desemba 30 kwa kukutana na Tunisia, mechi itakayofanyika kwenye Uwanja wa Prince Moulay ulioko jijini, Rabat.

Samatta aliliambia gazeti hili ili kufanya vizuri katika mashindano hayo, Stars inahitaji kupata maandalizi bora na mapema.

Nyota huyo alisema maandalizi sahihi yatasaidia kuwaimarisha wachezaji na kwenda Morocco wakiwa tayari na kamili kushindana.

"Nimefuatilia droo ya AFCON 2025 iliyofanyika Morocco, kundi letu ni gumu kama yalivyo makundi mengine, tunahitaji kufanya maandalizi ya kutosha kabla ya kuanza kwa mashindano," Samatta, mshambuliaji wa zamani wa Simba na TP Mazembe ya Jamhuri ya Kidemokrasi ya Congo (DR Congo), alisema.

Nahodha huyo ameungana na Kocha Mkuu wa Stars, Hemed Suleiman 'Morocco' ambaye ameshauri maandalizi ya timu hiyo yawahusishe Watanzania wote na si kuacha jukumu hilo kwa Shirikisho la Mpira wa Miguu Tanzania (TFF).

"Hili jambo si la mwalimu au benchi la ufundi, ni suala la kitaifa hasa pale katika  uwezeshwaji wa kutekeleza mipango ya mwalimu, sisi kama benchi la ufundi tutakuja na programu yetu na naamini ikifuatwa vyema tutafanya vizuri kwenye fainali hizi," alisema Morocco.

Kabla ya kushiriki fainali hizo za AFCON, Taifa Stars imekata tiketi ya kushiriki fainali za Kombe la Mataifa ya Afrika kwa Wachezaji wa Ndani (CHAN), zitakazofanyika kuanzia Agosti 2 hadi 30, mwaka huu.

Tanzania, Kenya na Uganda ndio wenyeji wa fainali hizo za CHAN, ambazo awali zilitarajiwa kufanyika kuanzia mapema Februari, mwaka huu.