MBUNGE wa Jimbo la Morogoro Kusini Mashariki (CCM)Mkoani Morogoro, Hamis Shabani Taletale maarufu Babu Tale, amesema wenye nia ya kugombea jimbo hilo katika uchaguzi mkuu wa mwaka huu, waanze kujindaa kisaikolojia

Amesema wajiandae kufiLisika, kwa kuwa yeye amejipanga vyema kupambana nao kwa gharama yoyote na haogopi kutumia pesa, kwa ajili ya  wananchi kupata maendeleo.

Babu Tale, amesema hayo wakati akiongea kwenye uzinduzi wa maadhimisho ya  miaka 48 ya kuzaliwa kwa Chama cha Mapinduzi (CCM) yaliyofanyika kimkoa  katika Tarafa ya Ngerengere iliyopo Halmashauri ya  wilaya ya Morogoro mkoni humo.

Amesema kuwa alipochaguliwa kuwa mbunge wa jimbo hilo, alikuta halina maendeleo yoyote, ikiwamo ubovu wa miundombinu mbalimbali, kama vile barabara, kero  sugu ya ukosefu wa maji na umeme, uhaba wa vituo vya afya na magari ya wagonjwa na upungufu wa shule za sekondari.

Amesema katika kipindi chake cha muda mfupi, ameweza kupambana na kumshawishi Rais Samia Suluhu Hassan, kutoa fedha za utekezaji wa miradi ikiwamo, ujenzi wa barabara ya kiwango cha lami  Bigwa-Kisaki, Ubena–Ngerengere pamoja na kufungua mitaa na vitongoji ambavyo vilikuwa havipitiki.

“Lilikuwa jimbo la mwisho kimaendeleo nikaamua kupambana, ili  kuleta maendeleo ikiwamo kutumia fedha zangu za mfukoni na limepata maendeleo na kuna watu wanaumimi sana.

Sasa nasema wazi wanaokuja kugombea wanapaswa kujipanga kikamilifu na watambue watafirisika kwa kuwa nimejipanga haswa na siogopi kutumia fedha, kwa ajili ya kusaidia wananchi waendelee kupata  maendeleo,” amesema Babu Tale.

Ametaja changamoto nyingine aliyoitatua ni pamoja na kuchangia ujenzi wa zahanati kwenye vijiji na vituo vya afya na kutoa magari matatu ya kubeba wagonjwa katika vituo vya  Ngerengere, Mkuyuni na Mikese.

“Leo natamba hapa Ngerengere mbele ya wananchi kwa kuwa nimeleta barabara ya lami kutoka Ubena- Ngerengere, nimeleta mradi mkubwa wa maji wa kutatua kero ya maji ya  vijiji vitano, nimeleta gari la wagonjwa na nimesaidia ujenzi wa shule za sekondari tatu,” amesema mbunge huyo.

Mjumbe wa Halmashauri Kuu Taifa (MNEC) wa Chama cha Mapinduzi (CCM) kupitia Mkoa wa Morogoro, Jonas Nkya, amempongeza Babu Tale, kwa kulipambania jimbo hilo, kupata maendeleo kwa muda mfupi kwa kuwa wananchi wake walikuwa nyuma kimaendeleo.

“Mimi ni shahidi hili Jimbo la Morogoro Kusini Mashariki, lilikuwa gumu mno na nyuma kimaendeleo kwa kuwa mama yangu Dk, Lucy Nkya, alishawahi kuwa Mmbunge wa jimbo hili na hakuna kijiji wala kata nisiyoijua au kufika, kweli Mbunge Babu Tale ameleta maendeleo,“ alisema Jonas.

Hata hivyo alitumia nafasi hiyo kuwataka wanachama wa CCM, kuachana na uhasama wa kisiasa ndani ya chama hicho, kwa kuwa wote wanajenga nyumba moja.

Akizindua maadhimisho hayo, Mwenyekiti wa CCM Mkoa wa Morogoro, Mhandisi Josephat Masunga, ameonya watu walioanza harakati za kupita katika majimbo kabla ya kutangazwa kwa uchaguzi, akiagiza viongozi kuwa imara kwa ajili ya kuwabaini, ili wachukuliwe hatua ndani ya chama hicho.