IMAMU wa mojawapo ya misikiti mitakatifu ya Kiislamu huko Mecca na Medina, anatarajiwa kuja nchini kushuhudia mashindano ya kimataifa ya Kurani Tukufu yanayotarajiwa kufanyika Februari 23 mwaka huu.

Akizungumza jijini Dar es Salaam, Mwenyekiti wa Tuzo  ya Kimataifa Quran Tukufu Tanzania, Sheikh Othman Kaporo, amesema ugeni huo unatarajiwa kunogesha mashindano ya Kurani ya mwaka huu ambayo yamezinduliwa jana na yamepangwa kufanyika katika Uwanja wa Benjamin Mkapa jijini Dar es Salaam.

Amesema ujio huo umetokana na heshima kubwa ambayo Tanzania imeanza kujijengea katika uandaaji wa mashindano hayo na kusema wamemwalika Rais Samia Suluhu Hassan kuwa mgeni rasmi katika tukio hilo.

“Mashindano ya mwaka huu yatafanyika Jumapili ya Februari 23 mwaka huu na kutakuwa na zawadi kwa washindani 25 watakaoshiriki kwenye shindano la mwaka huu lakini pia Mfalme wa Saudi Arabia naye ametoa ofa kugharamia safari ya kwenda kuhiji miongoni mwa wale watakaofika uwanjani,” amesema.

Kwa mujibu wa Kaporo, taarifa zaidi kuhusu zawadi na wageni wengine mashuhuhuri watakaohudhuria mashindano hayo zitazidi kutolewa kadri tarehe ya mashindano inavyozidi kukaribia. 

Kaporo alikuwa akizungumza katika uzinduzi wa mashindano ya mwaka huu ambapo mgeni rasmi alikuwa Waziri wa Ujenzi, Abdallah Ulega, ambaye alizipongeza tuzo hizo kwa umakini, ubunifu na uendelevu wake uliokipa heshima kubwa iliyonayo sasa.

Ulega pia amepongeza tuzo hizo kwa kumwalika Rais Samia Suluhu Hassan kwenye shughuli hiyo akisema kiongozi huyo ni alama ya maadili nchini na uwepo wake utatoa nafasi kubwa ya watu kumhimidi Mwenyezi Mungu kwa wingi siku hiyo.

“Si siri kwamba Rais Samia ni alama ya maadili mema katika jamii yetu ambayo inakabiliwa na tatizo kubwa la mmomonyoko wa maadili. Mmefanya jambo zuri kumwalika kwa sababu watu wengi wanaomfuatilia itabidi siku hiyo wafuatilie pia wasikilize mawaidha ya kumuenzi Mola wao,” amesema.