Mkuu wa Mkoa wa Shinyanga, Anamringi Macha, amefanya kikao kazi na Watumishi wa Serikali mkoani humo, ambapo aliwasilisha maagizo ya utendaji kazi na kutoa salamu za mwaka mpya 2025. Kikao hicho kilifanyika leo, Januari 9, 2025, katika ukumbi wa mikutano wa Ofisi ya Mkoa.

Akiwa ameshafikisha miezi 9 tangu kuteuliwa na Rais Samia Suluhu Hassan kuwa Mkuu wa Mkoa, Macha ameshukuru Watumishi wa Serikali kwa ushirikiano waliompa katika kutekeleza majukumu yake. Ameishukuru pia Serikali kwa kupeleka fedha nyingi mkoani Shinyanga mwaka 2024, ambazo zimetekeleza miradi mingi ya maendeleo.

Katika ujumbe wake wa mwaka mpya, Macha amewataka Watumishi wa Serikali kuendelea kufanya kazi kwa kujitolea, uzalendo, na kushirikiana na wananchi kutatua changamoto zao. Alisisitiza kuwa kazi isiwe ya kujionyesha mitandaoni, bali kutekelezwa kwa matokeo ya kweli.

Elimu: Mkuu wa Mkoa amekumbusha kuhusu ufunguzi wa shule zote Januari 13, 2025, akisisitiza Wakurugenzi na Maafisa Elimu kuhakikisha wanafunzi wote wanaandikishwa bila vikwazo. Amesisitiza pia wazazi kuwajibika kwa watoto wao na kutoa elimu kwa watoto wenye ulemavu, akionya dhidi ya kuwaficha watoto hawa.

Migogoro ya Ardhi: Macha ameeleza kwamba migogoro ya ardhi inachangiwa na wananchi na baadhi ya Watumishi wa Serikali, akitahadharisha kuhusu wahusika wa migogoro hii. Ameagiza Halmashauri, TANESCO, na Mamlaka za Maji kuacha kutoa huduma kwa watu waliovamia maeneo.

Kilimo: Amewaagiza Maafisa Ugani kuhakikisha kilimo kinatoka kwa tija, na kwamba Serikali imeshatoa vitendea kazi kwa wakulima.

Afya: Macha amesema Hospitali zote za Halmashauri za mkoani Shinyanga zina Madaktari Bingwa, na amesisitiza huduma bora kwa wananchi, pamoja na kuwapatia elimu ya bima ya Afya. Amesema pia kwamba Hospitali ya Rufaa Mkoa na Halmashauri zote zitakuwa na watu wa kuvaa koti la "Niulize" kuanzia Februari ili kusaidia wagonjwa.

Mazingira: Ameongeza kuwa usafi wa mazingira unapaswa kuzingatiwa kila mahali, na kuhamasisha upandaji miti katika kila Halmashauri.

Ustawi wa Jamii: Amesisitiza kupambana na ukatili wa kijinsia na kumpongeza Rais Samia kwa kutoa msaada wa chakula kwa makundi yenye uhitaji.

Maendeleo ya Jamii: Macha ametoa wito kwa Maafisa Maendeleo ya Jamii kusimamia mikopo ya asilimia 10 na kuepuka vikundi hewa.

Maji: Amesisitiza utunzaji wa vyanzo vya maji na kuongeza kasi ya usambazaji wa huduma ya maji kwa wananchi.

TANESCO: Macha amekumbusha kuhusu umuhimu wa kufuata kanuni na taratibu katika usambazaji wa huduma ya umeme kwa wananchi.

TANROADS na TARURA: Ametaka Wakandarasi kufanya kazi kwa ufanisi na kuhakikisha wananchi wanashirikishwa katika miradi ya maendeleo.

Ushirika: Ameagiza kusimamiwa vyema vyama vya ushirika na kufanya ukaguzi wa vitabu vya fedha.

Bodi ya Pamba: Amesisitiza udhibiti wa ubora wa mbegu za pamba na kupambana na wizi wa mbegu na madawa.

Mapato: Macha aliziagiza Halmashauri kubuni vyanzo vipya vya mapato na kuunda mahusiano mazuri na wadau.

Manunuzi: Amewasihi Maafisa Manunuzi kufuata taaluma zao na kuzingatia bajeti.

Safari za Kujifunza: Ameelekeza kuhusu utaratibu wa safari za kujifunza kuhakikisha zinaleta mafanikio.

Mbio za Mwenge: Macha amesema kuwa Mkoa wa Shinyanga haukufanya vizuri kwenye Mbio za Mwenge mwaka jana, na aliagiza maandalizi ya mwaka huu kuanza mapema ili kushika nafasi ya juu.

Mavazi Ofisini: Ametoa maelekezo kwa Katibu Tawala wa Mkoa kuhakikisha suala la mavazi ofisini linazingatiwa, na aliwasihi Watumishi kufanya kazi kwa ushirikiano na kuwa na mahusiano mazuri.