Wakala wa Barabara za Vijijini na Mijini (TARURA) Wilaya ya Ikungi, mkoani Singida, unatarajia kutumia shilingi 3,872,547,262.47 kwa ajili ya matengenezo ya barabara, miradi ya maendeleo, ujenzi wa madaraja, usimamizi wa miradi, pamoja na shughuli za ofisi.

Meneja wa TARURA Wilaya ya Ikungi, Mhandisi Ally Mimbi, alitoa taarifa hiyo kwenye mkutano wa Baraza la Madiwani uliofanyika katika ukumbi wa mikutano wa halmashauri ya wilaya hiyo, akieleza mpango wa matengenezo ya barabara na madaraja kwa mwaka wa fedha wa 2025/2026.

Kwa mujibu wa Mhandisi Mimbi, mpango huo utahusisha:
✅ Matengenezo ya barabara zenye jumla ya kilomita 103.1
✅ Ujenzi wa kalvati sanduku 18
✅ Ujenzi wa makalvati mistari 27
✅ Uchimbaji wa mitaro yenye urefu wa mita 900
✅ Ukarabati wa drifti moja na madaraja manne
✅ Ujenzi wa barabara kwa kiwango cha lami kwa mita 700

Bajeti ya Mradi

Mhandisi Mimbi alifafanua kuwa mpango huo wa bajeti umejumuisha:
🔹 Shilingi 834,503,764.21 kwa matengenezo ya barabara
🔹 Shilingi 2,000,000,000 kutoka tozo ya mafuta kwa maendeleo ya barabara
🔹 Shilingi 1,000,000,000 kwa miradi ya maendeleo ya jimbo
🔹 Shilingi 38,043,478.26 kwa usimamizi na utawala

Pia alieleza kuwa TARURA itaendelea kuzingatia hali ya barabara na kukamilisha miradi iliyoanzishwa badala ya kuanzisha mipya.

Katika majadiliano, Diwani wa Kata ya Iglansoni, Yusufu Athumani, alibainisha kuwa barabara ya Puma – Iglansoni ni nzuri, lakini sehemu ya Kijiji cha Kinyampembee inakumbwa na changamoto za mvua zinazosababisha tatizo kwenye daraja. Alishauri mamlaka husika kuhakikisha daraja hilo linaboreshwa ili kuondoa kero hiyo kwa wananchi.

Mhandisi Mimbi alisisitiza kuwa kazi zinazoendelea kwa sasa ni zile zilizopitishwa kwenye bajeti ya mwaka wa fedha uliopita.