MWENYEKITI wa Chama Cha Mapinduzi (CCM), Wilaya ya Shinyanga Mjini, Anord Makombe, amewaonya madereva wa bodaboda kuacha tabia ya kutongoza wake za watu pamoja wanafunzi.

Makombe amesema hayo wakati akizindua kituo cha maofisa usafirishaji bodaboda cha Majengo Mapya, sokoni, huku  akiwasihi pia watii sheria za usalama barabarani.

Uzinduzi huo umefanyika jana, Februari 3, 2025 katika kituo hicho cha na kuhudhuriwa na viongozi mbalimbali wa CCM wilayani humo.

Makombe akizungumza wakati wa kuzindua kituo hicho, amewapongeza vijana hao kwa kujiajiri wenyewe na kuendesha maisha yao.

“Wakati wa usafirishaji muwe na maadili na kuacha kutongoza wake za watu, wakiwamo na wanafunzi kugeuza wake zenu, ili kituo hiki kiwe cha mfano kwa bodaboda wote.

“Kituo hiki cha bodaboda kimezinduliwa na CCM hivyo tunataka kiwe cha mfano kwa bodaboda wote, kuweni na maadili mema msivunje ndoa za watu,” amesema Makombe.

Aidha, akijibu maombi ya vijana hao juu ya mikopo ya pikipiki, amewaahidi kulishughulikiwa sababu ilani ya CCM inatamka juu ya kusaidia vijana, huku akiwasihi waendelee kujiunga kwenye vikundi vya vijana, ili wapate mikopo ya halmashauri asilimia 10 ambayo pia hutolewa kwa vijana.

Katika hatua nyingine, amewaomba wananchi waendelee kuiamini CCM, ili kiendelee kushika dola na kuendelea kuwaletea maendeleo pamoja na kutatua matatizo yao.

Katibu wa CCM Wilaya ya Shinyanga Mjini, Hamisa Chacha, amepinga vikali baadhi ya watu ambao wamekuwa wakidharua kazi ya bodaboda na kubainisha kwamba kazi hiyo ni kama nyingine na ndiyo maana serikali ilitoa fursa ya kurahisisha usafirishaji.

Mjumbe wa kikundi hicho, Elias Kamuga,,akisoma taarifa, amesema kikundi chao kinazaidi ya miaka mitano na walianza wakiwa watu saba, lakini sasa hivi wamefikia 45 na wamepeleka baadhi ya vijana kusoma mafunzo ya udereva.

Amesema katika ya vijana hao 45 tayari wameshaunda kikundi cha watu watano, kwa ajili ya kuomba mkopo, huku wakiomba pia kusaidiwa kupata mikopo ya pikipiki.