WAKATI Simba Queens inaendelea kujiimarisha katika msimamo wa Ligi Kuu ya Wanawake Tanzania (TWPL), mshambuliaji wa timu hiyo, Jentrix Shikangwa, amefunga hat trick ya tatu msimu huu katika mechi ya ligi hiyo iliyochezwa kwenye Uwanja wa Tanzanite Kwaraa, Manyara juzi.

Mechi hiyo ilimalizika kwa wenyeji kuchapwa mabao 4-2, licha ya kutangulia kufunga mabao mawili kabla ya Simba kusawazisha na kupachika mengine mawili yaliyowapa pointi tatu muhimu.

Kwa matokeo hayo, mabingwa watetezi, Simba Queens imefikisha pointi 28 na kuendelea kuongoza katika msimamo wa ligi hiyo ikifuatiwa na JKT Queens yenye pointi 26, lakini ikiwa na mchezo mmoja mkononi.

Jentrix sasa amefikisha mabao 16 na kuwa kinara katika orodha ya wafungaji akichuana kwa karibu na Stumai Abdallah wa JKT Queens ambaye juzi alifunga bao moja katika ushindi wa magoli 3-0 dhidi ya Bunda Queens.

Bao lingine la Simba Queens katika mchezo huo lilifungwa na kiungo Mkenya Vivianne Corazone wakati Amina Hemedi na Mariam Elia, waliifungia Fountain Gate Princess.

Zena Ramadhani na Elizabeth Chenge, waliifungia pia JKT Queens katika mechi hiyo ya Ligi Kuu ya Wanawake Tanzania iliyochezwa kwenye Uwanja wa Jenerali Isamuhyo hapo juzi.

Katika mechi nyingine ya ligi hiyo, Yanga Princess ikiwa nyumbani kwenye Uwanja wa KMC Complex ilipata ushindi wa mabao 3-0 wakati Ceasiaa pia iliifunga Mashujaa Queens magoli 2-0 sawa na ushindi ambao Gets Program iliupata dhidi ya Mlandizi Queens. 

Mabao ya Gets Program katika mchezo huo wa raundi ya 10 yalifungwa na  Winifrida Juma na Beatrice Charles.

Kocha Mkuu wa Simba Queens, Yusif Basigi, aliliambia gazeti hili mechi hiyo ilikuwa ngumu kwa sababu walikutana na wachezaji wenye kasi.

Basigi alisema alifanyia kazi mapungufu ya kikosi chake yaliyoonekana katika kipindi cha kwanza na waliporejea dakika 45 za mwisho walikuwa imara.

"Tumekutana na timu nzuri, yenye uwezo na kasi, lakini ubora wa wachezaji wangu ulisaidia kubadilisha matokeo, nashukuru kipindi cha pili tulitawala mchezo," alisema Basigi.

Ligi Kuu ya Wanawake Tanzania itaendelea tena Februari 4, mwaka huu kwa Mashujaa Queens kuwaalika Yanga Princess, Mlandizi kuikabili JKT Queens, Alliance Girls dhidi ya Gets Program huku Bunda Queens itawakaribisha Fountain Gate Princess na Simba Queens itarejea nyumbani kuwaalika Ceasiaa Queens.