Zaidi ya abiria milioni 1 wasafiri kwa SGR tangu kuzinduliwa

By Mwandishi Wetu , Nipashe

Published at 10:14 AM Jan 19 2025

Picha: Mtandao

Zaidi ya abiria milioni 1 wasafiri kwa SGR tangu kuzinduliwa.

Tangu kuzinduliwa kwa huduma ya usafiri kwa reli ya kisasa (SGR) mwezi Agosti 2024 hadi Desemba 11, 2024, zaidi ya abiria 1,200,000 wameitumia treni hiyo, ikiashiria mafanikio makubwa katika sekta ya usafirishaji nchini.

Akizungumza jijini Dodoma wakati wa Mkutano Mkuu wa CCM, Waziri Mkuu Kassim Majaliwa aliwasilisha Taarifa ya Serikali ya Jamhuri ya Muungano wa Tanzania kuhusu Utekelezaji wa Ilani ya CCM ya Uchaguzi Mkuu wa mwaka 2020 kwa kipindi cha miaka minne (2020-2024).

Mafanikio ya SGR

Majaliwa amesema kuwa huduma ya usafiri kupitia reli ya kisasa imeleta mapinduzi makubwa kwa kupunguza muda wa kusafiri, kuongeza tija katika biashara, na kuchochea ukuaji wa uchumi.

Kwa mujibu wa Waziri Mkuu, mradi huo umeiwezesha Serikali kukusanya mapato ya shilingi bilioni 30. Katika juhudi za kuboresha zaidi huduma za SGR, Serikali imenunua vichwa 17 vya treni ya umeme pamoja na mabehewa 65 ya abiria.

Majaliwa amebainisha kuwa SGR ni moja ya miradi mikubwa inayotekelezwa chini ya Ilani ya CCM, ikilenga kuboresha miundombinu na huduma kwa wananchi, sambamba na kuimarisha uchumi wa taifa.