KUELEKEA mechi za mzunguko wa pili wa Ligi Kuu Tanzania Bara inayotarajiwa kuendelea tena kuanzia Februari Mosi, mwaka huu, Kocha Mkuu wa Namungo FC, Juma Mgunda amesema "tumeimarika".

Akizungumza na gazeti hili jana, Mgunda alisema mapumziko yaliyopatikana yamemsaidia kufanyia kazi mapungufu mbalimbali aliyoyabaini katika kikosi chake.

Mgunda alisema ametoa programu maalumu kwa kila idara kwa sababu anahitaji kupata matokeo mazuri katika michezo yote ya mzunguko wa pili wa ligi hiyo.

"Tumefanyia kazi mambo mbalimbali, kila unapofanya mazoezi, unapata nafasi ya kuelekeza mbinu mpya, tuseme mapumziko ya ligi yamekuwa na tafsiri chanya upande wetu, yametusaidia kujiimarisha, sasa tuko tayari kuendelea na mapambano," alisema Mgunda.

Nahodha wa timu hiyo, Erasto Nyoni, aliliambia gazeti hili wamejipanga kurejesha furaha kwa mashabiki wao ambao hawakushuhudia mambo mazuri katika kikosi chao kwenye mechi za awali za msimu.

Beki huyo wa zamani wa Azam FC na Simba, alisema wachezaji wote wamejiandaa kukutana na ushindani katika hatua hiyo ya pili kwa sababu kila upande unahitaji kutimiza malengo yake.

"Hatukuwa na mwendelezo mzuri, tumepitia wakati mgumu, lakini sasa tunaahidi kurejea kwa furaha, tunajua haitakuwa rahisi, lakini tuko tayari kuipambania timu yetu na hatimaye kufikia malengo," beki huyo mkongwe alisema.

Aliongeza hawatabweteka na mechi yoyote na wanafahamu hakutakuwa na mchezo mwepesi.

"Kila timu itaingia uwanjani ikiwa imejipanga kusaka ushindi au sare na si kupoteza, hapa ndio panapoongeza ugumu, hakuna timu itakayoingia uwanjani na matokeo yake, hivyo ili kupata ushindi ni lazima uwe bora," Nyoni aliongeza.

Katika msimamo wa Ligi Kuu Tanzania Bara, Namungo FC yenye pointi 17 iko nafasi ya 12, imeshinda michezo mitano, sare mbili na imepoteza mechi tano msimu huu.

Simba yenye pointi 40 ndio vinara wa ligi hiyo yenye timu 16 huku mabingwa watetezi, Yanga yenye pointi 39 inafuatia katika msimamo huo, wakati KenGold ya jijini Mbeya ikiburuza mkia na pointi zake sita kibindoni.