WIZARA ya Elimu, Sayansi na Teknolojia, imesema hatua madhubuti zinachukuliwa ili kuboresha ufaulu wa masomo ya Sayansi, Hisabati na Teknolojia ya Habari na Mawasiliano (Tehama) nchini.

Katika juhudi za kuimarisha Elimu, Wizara imeeleza kuwa walimu wa masomo hayo wanapatiwa mafunzo ya kila mara, kwa lengo la kuboresha ufanisi wao katika ufundishaji na ujifunzaji.

Akizungumza wakati wa ufunguzi wa mafunzo maalum kwa walimu wa masomo ya Sayansi, Hisabati na Teknolojia ya Habari na Mawasiliano (Tehama), kutoka  mikoa ya Arusha na Kilimanjaro, Mratibu wa Kituo cha Arusha, Majaliwa Mkalawa, alisema kuwa ni sehemu ya jitihada za serikali katika kuhakikisha kuwa taifa linakuwa na wataalamu bora katika sekta ya Sayansi na Teknolojia.

Alisema kuwa, kupitia Mradi wa Kuimarisha wa Elimu ya Sekondari  nchini (SEQUIP), Wizara inatoa mafunzo maalum kwa walimu kazini ili kuwajengea uwezo wa kufundisha masomo hayo kwa ufanisi zaidi.

Alisema lengo la mafunzo hayo ni kuhakikisha kuwa walimu wanapata mbinu bora za ufundishaji, huku wakifundisha masomo ya Sayansi, Hisabati na Tehama kwa njia inayowavutia na kuwahamasisha wanafunzi.

“Wizara imedhamiria kuboresha ufundishaji wa masomo ya Sayansi, Hisabati na Tehama kwa walimu, ili kuongeza ufanisi wanafunzi kuyapenda masomo hayo na kufanya vizuri kwenye mitihani yao, hatua hizi zinatarajiwa kuchangia kwa kiasi kikubwa katika maendeleo ya taifa, kwa kutoa wataalamu bora katika sekta ya Sayansi na Teknolojia, ambao wataweza kushughulikia vikwazo vya kiuchumi na kijamii,” alisema Mkalawa.