Prof. Shemdoe atoa maagizo kwa wazabuni watakaosambaza chanjo ya mifugo

By Mwandishi Wetu , Nipashe

Published at 06:53 PM Jan 21 2025

Picha: Mtandao

Katibu Mkuu, Wizara ya Mifugo na Uvuvi Prof. Riziki Shemdoe.

Katibu Mkuu, Wizara ya Mifugo na Uvuvi Prof. Riziki Shemdoe amewataka wazabuni waliopewa jukumu la kusambaza chanjo kwa ajili ya kampeni ya chanjo ya mifugo nchini kuhakikisha kazi hiyo wanaifanya vyema kwa kushirikiana na wazalishaji.

Ameyasema hayo wakati wa hafla fupi ya utiaji saini mikataba baina ya wizara na wazabuni hao watakaosambaza chanjo ya mifugo nchini iliyofanyika jijini Dodoma Januari 21, 2025.

Prof. Shemdoe ameongeza kuwa utoaji wa chanjo hiyo kwa mifugo inatakaiwa kufanyika chini ya uangalizi wa wazalishaji kwa kushirikiana na wataalamu watakao kuwa wanafanya kazi hiyo ili kusaidia kutatua changamoto zitakazojitokeza wakati wa zoezi hilo.

Aidha Prof. Shemdoe ametoa shukrani kwa Rais Samia Suluhu Hassan kwa kuridhia na kuwezesha utoaji wa chanjo hiyo mwaka huu na kuwapa kipaumbele makampuni yanayozalisha chanjo ndani ya nchi kuweza kusambaza chanjo hiyo nchi nzima.

Kampuni zitakazotumika katika uzalishaji wa chanjo wa chanjo hiyo ni pamoja na Wakala ya Maabara ya Veterinari Tanzania (TVLA), Hester Biosciences Afica Limited (HBAL) na Novel Vaccine and Biological Limited (NOVABI).