WAZIRI wa Ujenzi, Abdallah Ulega, ametangaza kuwa serikali imetenga zaidi ya Sh. bilioni 114 kukarabati barabara za mikoa ya Kusini zilizoharibiwa na mvua ya El- Nino huku akiagiza taa za kutosha kuwekwa kwenye barabara kuu kuelekea mikoa ya Kusini.

Akizungumza katika maeneo tofauti wakati wa ziara yake mkoani Lindi juzi na jana, Ulega alisema kiasi hicho cha fedha kilichotengwa kwa mkoa wa Lindi ndicho  kikubwa zaidi kutengwa kuliko mkoa mwingine wowote hapa nchini.

“ Ndugu zangu wa Lindi, nimekuja kukagua barabara zetu baada ya matatizo ya mvua za El Nino na hiki kimbunga cha Hidaya. Rais (Samia Suluhu Hassan) ameniagiza nije huku kuangalia hali na kuwapa pole kwa changamoto mnazopitia.

“Kwa mapenzi yake makubwa kwenu na kwa Watanzania kwa ujumla wake, Rais Samia ameagiza tutumie zaidi ya shilingi bilioni 114 kwa ajili ya kurekebisha barabara na madaraja yaliyoharibiwa na kutengengeza njia za kuchepusha,” alisema Ulega wakati akiwa eneo la Somanga. 

Mvua ya El Nino iliyonyesha nchini mwishoni mwa mwaka jana,  ilifuatia msimu wa mvua za masika zilizosababisha uharibifu mkubwa wa miundombinu katika maeneo tofauti nchini, ingawa mikoa ya Kusini iliathirika zaidi.

Katika ziara yake hiyo, Ulega alijionea uharibifu uliosababishwa na mvua hizo na pia juhudi za wakandarasi wanaojenga barabara hizo – wakiwamo wakandarasi wazalendo.

Baadhi ya makandarasi walionyesha kuwa na kasi ya utekelezaji wa ukarabati, wakiwa wamefikia lengo miezi miwili kabla ya wakati waliokuwa wamepewa.

Katika hatua nyingine, Ulega ameagiza Wakala wa Barabara Tanzania (TANROADS) kuanza kuweka taa katika barabara kuu inayoelekea mikoa ya Kusini ili kukuza shughuli za kiuchumi katika maeneo inakopita.

Waziri huyo ambaye sasa ameanza kujipambanua kwa kaulimbiu yake ya usiku na mchana, alisema sera za Rais Samia ni za kukuza uchumi na kuwa maeneo ambako kuna giza ni vigumu kwa uchumi kukua.

“TANROADS naomba taa zianze kuwaka kwenye barabara hii ya kuja Kusini mwa Tanzania. Haya ni maelekezo ya Rais wetu na kazi yenu ni kuhakikisha mnatekeleza agizo hilo kwa kufanya kazi usiku na mchana,” alisema.

Mbali na kukagua maendeleo ya ukarabati wa miundombinu, Ulega pia anatumia ziara hii kueleza mafanikio kadhaa yaliyopatikana kwenye eneo la ujenzi kwenye miaka mitatu ya uongozi wa Rais Samia.