Masindi apewa somo kuimarisha zao la pamba

By Marco Maduhu , Nipashe

Published at 10:54 AM Jan 28 2025

Picha: Mpigapicha Wetu

Mkuu wa Mkoa wa Shinyanga, Anamringi Macha (kulia), akimwapisha Mkuu wa Wilaya Kishapu, Peter Masindi.

MKUU wa Mkoa wa Shinyanga, Anamringi Macha, amemwapisha Mkuu wa Wilaya ya Kishapu, Peter Masindi, huku akimpatia maagizo kwenda kusimamia amani na kilimo hasa zao la pamba.

Hafla hiyo ya uapisho imefanyika jana, Januari 27, 2025 katika ukumbi wa mikutano wa mkuu wa mkoa wa Shinyanga na kuhudhuriwa na viongozi mbalimbali wa serikali pamoja na chama.

Alisema kwamba kwa kuwa ameaminiwa na Rais Samia Suluhu Hassan na kuteuliwa kuwa mkuu wa wilaya Kishapu, anapaswa kuchapa kazi ya kuwatumikia wananchi.

“Rais Samia katika uongozi wake yeye ni kocha na sisi ni wachezaji, ndiyo maana amekuwa akipanga nafasi yake ya ushindi na kubadilisha wachezaji uwanjani, hivyo nakupongeza sana Masindi kwa kuaminiwa na rais na kuteuliwa kuwa DC wa Kishapu, tunakukaribisha na tufanye kazi kwa ushirikiano,” amesema Macha.

“Nenda ukasimamie suala la amani katika wilaya yako, na ufanye kazi kwa uaminifu kama ulivyoapa, kasimamie pia suala la kilimo likiwamo zao la pamba, ndiyo zao kuu la biashara,” ameongeza.

Amewaagiza pia wakuu wa wilaya na wakurugenzi kusimamia suala la wanafunzi kuandikishwa darasa la awali na la kwanza pamoja na wanafunzi wa kidato cha kwanza, kuripoti shuleni, kwa sababu mahudhurio yanaonekana siyo mazuri.

Amewaasa pia wazazi kutowapeleka watoto shule wenye matatizo ya ulemavu na kutoa maelekezo kwa walimu kuwaandikisha bila ya kujali hali zao.

Mkuu wa Wilaya ya Kahama, Mboni Mhita, akizungumza kwa niaba ya wakuu wa wilaya wengine mkoani humo, amemkaribisha Masindi, huku wakiahidi kumpatia ushirikiano.

Mwenyekiti wa CCM Wilaya ya Shinyanga Mjini, Anold Makombe, amemsihi Masindi, kwamba ameaminiwa na Rais Samia na anachopaswa ni kuchapa kazi kwa kushirikiana na wenzake, pamoja na kutatua changamoto za wananchi.

Masindi, amesema anamshukuru Rais Samia kwa kumuamini na kumteua kuwa mkuu wa wilaya hiyo na kwamba hata mwangusha, bali atachapa kazi na kuwatumikia wananchi kama alivyo kula kiapo.

“Naombeni ushirikiano wenu, ili tufanye kazi na kumsaidia Rais Samia, pale penye ushauri nipeni kama mahali kuna tatizo mniambie, ili turekebishe na kusafiri pamoja na maelekezo ambayo mkuu wa mkoa ameyatoa nitayafanyia kazi,” amesema Masindi.

Aliyekuwa mkuu wa wilaya hiyo, Joseph Mkude, ambaye amehamishwa kituo cha kazi na kwenda Arusha, amewashukuru viongozi wote wa Mkoa wa Shinyanga, kwa kumpatia ushirikiano wote wakati akitumikia wilaya hiyo.

Januari 25, mwaka huu, Rais Samia alifanya uteuzi wa viongozi mbalimbali pamoja na wengine kuwahamisha vituo vya kazi.

Masindi alikuwa Katibu Tawala wa Wilaya ya Nkalama na kuteulwia kuwa mkuu wa wilaya ya Kishapu.