Magufuli akerwa na michango shule za Serikali

17Jan 2018
Na Mwandishi Wetu
Nipashe
Magufuli akerwa na michango shule za Serikali

Rais Dkt. John Magufuli leo Januari 17, 2018 amepiga marufuku aina yoyote ya michango katika shule za Serikali za msingi na Sekondari na kuwaagiza waziri Suleiman Jaffo na Waziri wa Elimu Profesa Joyce Ndalichako kusimamia hilo.

Magufuli amepiga marufuku hiyo alipokutana na Waziri Ofisi ya Rais Tawala za Mikoa na Serikali za Mitaa (TAMISEMI) Selemani S. Jafo na Waziri wa Elimu, Sayansi, Teknolojia na Ufundi Profesa Joyce L. Ndalichako Ikulu jijini Dar es salaam na kuwataka mawaziri hao kwenda kusimamia jambo hilo na kuhakikisha hakuna michango yoyote kwa wanafunzi au wazazi wanachangishwa kwenye shule za sekondari.

"Tumesema elimu bure,  haiwezi ikaja kwa mgongo mwingine ikawa elimu pesa ...tumeweka utaratibu kwamba kuanzia shule ya msingi mpaka sekondari kidato cha nne hakuna kulipa ada yoyote lakini sasa hivi michango ya kila aina", Alisema 

Na kuongeza kuwa "Nimewapa maelekezo kwamba kuanzia leo iwe ni marufuku na wakalisimamie hili sitaki kusikia mwanachi yoyote mahali popote akilalamika kwamba mtoto wake amerudishwa shule kwa sababu ya michango na walimu wote popote walipo wasishike mchango wowote wa mwanafunzi" alisema Rais Magufuli.

Aidha Rais Magufuli amesema kuwa kama kutakuwepo na mchango wowote wa mzazi ambaye atajisikia kuchangia jambo lolote kuhusu masuala ya shule basi pesa hizo zipelekwe kwa Mkurugenzi na si kushikwa na mwalimu yoyote yule 

 

Habari Kubwa