JK aibua hoja utawala bora, umaskini

23May 2019
Na Mwandishi Wetu
DAR
Nipashe
JK aibua hoja utawala bora, umaskini

RAIS mstaafu wa awamu ya nne, Jakaya Kikwete, amesema kukosekana kwa umoja, utawala bora na uwepo wa umaskini ni miongoni mwa matatizo yanayozikandamiza nchi nyingi za Afrika, hivyo kuzikosesha maendeleo.

RAIS mstaafu wa awamu ya nne, Jakaya Kikwete.

Akizungumza kwenye Tamasha la 11 la Kigoda cha Mwalimu Nyerere,Kikwete alisema licha ya kufanikiwa kupata uhuru, nchi nyingi za Afrika ni maskini.

Alisema wakati viongozi kadhaa wa Afrika walipata nafasi ya kukutana kwenye nchi za Ulaya waliunganisha nguvu zao za kiharati katika kutetea Afrika, hatimaye kufanikiwa kusaidia kupatikana kwa uhuru kuanzia mwaka 1950 hadi 1964.

Kikwete aliyekuwa mgeni rasmi kwenye tamasha hilo lililokusanya wasomi wa viwango mbalimbali kutoka katika nchi tofauti, alisema kuna nchi bado zinatawaliwa kijeshi, viongozi wengine wamekaa madarakani kwa muda mrefu.

Alisema kuna wakati viongozi wa Umoja wa Afrika (AU) walianzisha utaratibu wa kujitathmini ambapo viongozi waliitwa na kupewa maoni ya kujisahihisha, wapo waliofanyia kazi na wengine waliyaweka.

Akizungumzia kuhusu umasikni Kikwete alisema katika nchi 30 maskini duniani 27 ni kutoka Afrika.

“Watu wetu wanakabiliwa na umaskini mkubwa sana, haya ndiyo mambo ambayo Afrika inatakiwa iungane kukabiliana nayo, tumetoka mbali na tulikuwa na mafanikio kwenye kujipatia uhuru, lakini licha ya jitihada tumeshindwa kujikomboa kutoka kwenye hali duni,” alisema.

Alisema hali ya uanaharakati iliyoanzishwa na waasisi wa nchi za Afrika kabla na baada ya uhuru, walibaini kuwapo kwa matatizo hayo walikubaliana kuyatatua kwa umoja, lakini hadi sasa harakati hazijafanikiwa.

Kikwete alisema katika nchi 54 zilizopo katika bara la Afrika, ni nchi moja pekee ndiyo inatajwa kuwa imeendelea nayo ni Mauritius wakati 27 kati ya hizo zipo katika uchumi wa kati.

Alibainisha kuwa nchi zimekosa umoja hata katika kujitafutia masoko ya bidhaa mbalimbali, kila moja inajitafutia binafsi, hivyo elimu inahitajika ili kuwezesha waafrika kupambana kuunganisha nguvu zao katika kujitafutia maendeleo.

Katika tamasha hilo, Profesa Rwekaza Mukandala, Makamu Mkuu wa Chuo Kikuu cha Dar es Salaam (UDSM)mstaafu, alisimikwa kuwa Mwenyekiti wa Kigoda hicho, akimfuatia Profesa Penina.

Katika hotuba yake Prof. Mukandala alisema harakati za kiafrika ni vyema zikiendana na sera zote zilizopo kwenye nchi husika.

Alisema kizazi cha kati kinachopata nafasi ya kushika uongozi, baadhi yao wamekuwa wakiongoza katika maslahi yao binafsi.

“Kutokana na hali hiyo, kuna wakati lilibainika pengo la uongozi katika baadhi ya nchi, tofauti na walivyokuwa wakiongoza kina Jomo Kenyatta na Mwalimu Nyerere,” alisema.

Tamasha hilo la siku tatu kuanzia Mei 22 hadi 24 ni la wazi kwa watu wote, na linatajwa kuendelea kuwavutia wasomi wa nchi mbalimbali hasa za Afrika.

Wazungumzaji wakuu ni Prof. Patrick Lumumba kutoka Kenya, Ali Mufuruki atazungumzia kuhusu soko huria na dola, huku Profesa Georges Ntalaja, raia wa Kongo anayeishi Marekani atazunguzia kuhusu utawala bora na siasa. Profesa Paul Zeleza kutoka Malawi, Dk Suzan Kavuma Uganda atazungumzia kuhusu hali ya Uganda na kuendeleza viwanda.

Tamasha hilo linaendeshwa chini ya usimamizi wa Chuo Kikuu cha Dar es Salaam,lengo likiwa ni kuhuisha mawazo ya Mwalimu Nyerere kwa kuwezesha yatumike katika kuleta chachu ya maendeleo nchini na Afrika kwa ujumla.

Habari Kubwa