Camara: Mechi za CAF sio rahisi

By Faustine Feliciane , Nipashe

Published at 08:13 AM Nov 29 2024

Picha: Mtandao

Golikipa Moussa Camara.

SHUJAA kwenye mchezo wa juzi wa Kombe la Shirikisho Afrika kwa upande wa Simba, golikipa Moussa Camara, amesema licha ya ushindi wa bao 1-0 walioupata dhidi ya klabu ya Bravos do Maquiz ya Angola, michezo ya CAF ni migumu hasa kwenye hatua ya makundi.

Juzi Simba ilifanikiwa kupata ushindi huo katika mchezo wa kwanza hatua ya makundi kwa bao pekee la mkwaju wa penalti lililofungwa na Jean Charles Aoua huku Camara akidaka mkwaju wa penalti.

Akizungumza baada ya mchezo huo, Camara, alisema anashukuru kuisaidia timu yake kuibuka na ushindi lakini kazi haikuwa nyepesi.

"Haukuwa mchezo mwepesi, ni mchezo mgumu lakini ni furaha kuona tumepata ushindi, wapinzani wetu walibadilika sana kipindi cha pili lakini tulisimama imara," alisema Camara.

Aidha, alisema michezo hiyo kwenye hatua ya makundi si mepesi kwa kuwa kila timu inakuwa imejiandaa kikamilifu na zina ubora ndio maana zimefika hatua hiyo.

"Hakuna timu nyepesi kwenye hatua hii, kikubwa kwetu ni kujipanga kuhakikisha tunapata ushindi kwenye kila mchezo ili kuingia hatua inayofuata," alisema.

Mbali na kudaka penalti, Camara alikuwa kwenye kiwango cha juu kwenye mchezo huo ambapo aliokoa hatari nyingi golini kwake na kuihakikishia Simba kupata pointi tatu muhimu.