Njaa ikiingia kichwani PhD hugeuka tope

13May 2017
Nkwazi Mhango
Nipashe
Hekaya za Mlevi wa Canada
Njaa ikiingia kichwani PhD hugeuka tope

JUZI wakati waheshimiwa wa mjengoni wakijadili bajeti, pamoja na ulevi wangu, niligundua kitu ambacho wengi hawajaona. Kama si jamaa yangu mmoja, tena aliyekuwa akionekana msomi wa kweli mwenye DPh ya sharia kama mimi kuonyesha ukihiyo wake tena hadharani kwenye mjengo, nisingeandika haya.

Jamaa ambaye ana bahati ya kuteuliwa kwenye maulaji kupitia viti vya dezo si ukafika wakati wa kuchangia bajeti ya wizara yake. Badala aongelee yaliyomo kwenye bajeti yake, akapaaza sauti tena kwa hasira baada ya dogo mmoja kumzodoa.

Badala ya kuelezea wizara yake itakavyotenda haki kwa walevi hasa wanaosumbuliwa na kesi za kubambikiwa na ndata ukiachia mbali kuchukua miaka kibao kuhukumiwa, jamaa alianza kumsifia malkia utadhani kaya yetu bado ni koloni.

Aliniacha hoi pale alipodai malkia ni taswira ya kaya ya utashani; hivyo na rahis wetu ni hivyo. Sidhani kama tunapaswa kuendelea na hekma za kikoloni kama hizi.

Taswira ya kaya ni wana kaya wenyewe hata kama ni ombaomba na walevi. Sijui kama rahis mwenye kuvaa suti za bei kali huku akisafiria midude ya bei mbaya anaweza kuwa taswira ya kweli ya walevi waliopigika.

Hapa lazima wasomi wetu wajifunze kuwa critical na siyo –ku-bloviate (kupoteza wakati kuzungumza utumbo), na ku-pontificate (kuongea kunakoudhi wengine) mambo na kukariri kama kasuku.

Hakuna jamaa aliponiacha hoi kama kulalia kwenye kitumbua chake kiasi cha kujigongagonga kwa waliompa ulaji akasahau kuwa wahishimiwa walikuwa wakijadili bajeti ya walevi wote.

Hata hivyo, anamwakilisha nani zaidi ya aliyempa tonge la tumbo lake?

Ajabu nyingine ni pale jamaa alipotoa mpya kuwa anajivunia kuwa mteuliwa dezo. Wale waliohenyekea ulaji walimshangaa wakabaki kutikisa vichwa kuonyesha namna gani alikuwa amechemsha.

Badala ya kuongelea sera aliendelea kujigonga kwa waliompa ulaji kiasi cha kutia kinyaa ukiachia mbali kuwaacha wengi vinywa wazi wakihoji ubobezi na usomi wake.

Walevi waliokuwa wakiangalia video hii ya dezo walibaki kushangaa. Mmoja alisema “kumbe ndiyo maana wamezuia kuonyesha haya maigizo laivu siyo!”
Jamaa ambaye huitwa profwedheha sawa na profedheha Kajuo, alipandisha mizuka kiasi cha kugeuza mjengo kuwa chumba cha muhadhara.

Ajabu ya maajabu, kidhabi huyu aliyekuwa akitetea ulaji wake kwa kumtukuza muungu uliomteua, alianza kufundisha kimakonde badala ya torati jambo ambalo lilizidi kuwaudhi na kuwachanganya walevi.

Jamaa kuonyesha elimu yake ilivyo na shaka, si akaanza kuwatukuza wakoloni kuwa ni wastaarabu na hawawezi kumwambia mlevi kuwa ni bunga au zoba pale anapoonyesha kutoelewa.

Ajabu ya maajabu, mwalimu wangu huyu hakuelewa hata somo lake kiasi cha kuanza kurusha matusi akiwaita waishiwa wenzake wapumbavu badala ya kuiga ustaarabu wa mabwana zake aliowasifia kupita kiasi.

Mwalimu huyu wa ukoloni aliwaacha walevi hoi pale alipowambia wahishimiwa kuwa wanaongea kimakonde kikavu wakati yeye akiongea kilichoungua. Ni kwanini jamaa huyu anayonekana kapiga buku alisahau kujua kitu kimoja kidogo kuwa wahishimiwa hawakwenda kwenye mashindano ya kuongea kimakonde bali kuwawakilisha walevi.

Hivi inasaidia nini mlevi tena anayeheshimika kama msomi kwenda mjengoni kufundisha kimakonde au historia ya sharia kwa wahishimiwa badala ya kuelezea sera zake? Hapa ndipo namkumbuka mhishimiwa mmoja aliyesema kuwa ukiona mlevi mwenye DHp anajigonga kwa wenye ulaji, ujue hajaelimika hata kama alipata madaraja ya A+ kwenye masomo yote. Hamkumuona yule mwingine anayepoteza muda kibao bila kutoa maelezo juu ya uchunguzi wa jinai ya kuvamia vituo vya wanahabari ambao umemfanya aendelee kunywea kwa kuogopa kijitu chenye division zero? Hivi huyu naye ni msomi wa kweli kweli?

Kwa vile naona kipenga cha kwenda kupata kimelia, leo nitaachia hapa kwa kuwataka wasomaji na walevi waanze kubadili tabia ya kuamini kila anayesema ana DPh. Lazima tupime matendo na mawazo yao. Kwani, wengi walikariri tu. Ukitaka kujua ninaomaanisha, angalia wale wote wanaoogopa au kutumiwa hata vihiyo walioghushi kama Bashit.

Sijui kati yao na huyu jamaa nani anayeweza kuitwa msomi. Sifahamu maana ya usomi kama usomi wenyewe ni ukasuku, ukuku na upwakiaji wa madude bila kupitisha kwenye bongo la yule anayefanya hivyo. Ama kweli, njaa inapopanda upstairs, DPh yaweza kugeuka Baashit kama siyo bullshit.