|
Daraja la Kiteputepu limeanza kuharibika
2008-05-11 20:01:56
Na Radio One Habari
Daraja la Kiteputepu linalounganisha wilaya za Sumbawanga na Mbozi limeanza kuharibika, hivyo kuzusha wasiwasi kwa watumiaji na kuzorotesha usafirishaji wa mazao kutoka mashambani na mifugo.
Pamoja na kuelezea wasiwasi huo, wakaazi wa wilaya hiyo waishio karibu na daraja hilo wametaka hatua zichukuliwe kudhibiti matukio ya uhalifu eneo hilo kwani wahalifu huwavizia watu usiku na kuwakaba na wengine kutoswa mtoni ili kupoteza ushahidi hasa nyakati za shughuli za minada.
Msimamizi wa kivuko hicho Bwana Magogo Sanga amesema daraja hilo lililojengwa na Kanisa Katoliki mwaka 1995, limekuwa msaada mkubwa kuunganisha pande mbili za mikoa ya Mbeya na Rukwa ambapo wastani wa watu elfu mbili hutumia kwa siku.
Hata hivyo Bwana Sanga amesema nguvu ya serikali inahitajika katika kuliimarisha badala ya kuliachia kanisa liendelee kukikarabati.
Tathmini iliyofanywa na wakala wa barabara TANROADS, imeonesha kuwa ujenzi wa daraja la kuunganisha mikoa miwili ya Rukwa na Mbeya kupitia barabara ya Kamsamba ungegharimu zaidi ya shilingi bilion tatu.
|
